হোমেন বৰগোহাঞিৰ গ্ৰন্থপঞ্জী (দ্বিতীয় খণ্ড)

 

শিশু আৰু কিশোৰৰ বাবে লিখা গ্ৰন্থ (দ্বিতীয় খণ্ড)

আধুনীক যুগৰ জন্ম কাহিনী (১৯৮৯) :-

আধুনিক যুগৰ জন্ম কাহিনী (প্ৰথম সংস্কৰণ)

বর্তমানৰ পৃথিৱীখন গঢ় লৈ উঠাৰ অন্তৰালত বহুতো ব্যক্তিৰ সাধনা আৰু পৰিশ্ৰম নিহিত হৈ আছে৷ ইউৰোপৰ ইটালীত আৰম্ভ নৱজাগৰণে গোটেই পৃথিৱীলৈ আধুনিকতাৰ ধল বোৱাইছিল৷ শিক্ষা-সংস্কৃতি-সভ্যতাৰ দ্ৰুত বিকাশে কেনেকৈ আন আন ৰাষ্ট্ৰত ৰাজনীতি, সাহিত্য, শিল্পকলা, বিজ্ঞান আদিত আধুনীক যুগৰ সূচনা কৰিলে এইবোৰ কথা কিশোৰ উপযোগীকৈ কিতাপখনত বর্ণনা কৰিছে৷ লগতে লিঅ’নার্ড দা ভিন্সি, এৰিষ্টটল, মাইকেল এঞ্জেল, নিকোলাছ ক’পার্নিকাছ, ক্ৰিষ্টোফাৰ কলম্বাছ, গেলিলিঅ’ গেলিলিৰ জীৱনৰ কথাও উল্লেখ কৰিছে৷  

কিতাপ পঢ়াৰ আনন্দ (১৯৯১) :- 

কিতাপ পঢ়াৰ আনন্দ (প্ৰথম সংস্কৰণ)

লিপি, কাকত,  কিতাপ, মুদ্ৰণ যন্ত্ৰৰ আৱিস্কাৰকে ধৰি কিতাপৰ হাজাৰ বছৰীয়া ইতিহাস বর্ণনাৰে আৰম্ভ কৰি স্মৃতি-শক্তি, চিন্তা শক্তি, কিতাপ পঢ়াৰ অভ্যাস, কিয় পঢ়িব লাগে আৰু কেনেদৰে পঢ়িব লাগে, টান কিতাপ কেনেকৈ পঢ়িব লাগে এনে অসংখ্য চিন্তা উদ্ৰেগকাৰী কথাৰে কিশোৰৰ বাবে লিখা কিতাপ৷ কিতাপখন পঢ়ি বহুতো অসমীয়া ছাত্ৰক কিতাপৰ প্ৰতি আগ্ৰহী কৰি তোলাৰ লগতে  কিতাপ পঢ়িবলৈ শিকিছিল৷  

কিতাপ পঢ়াৰ আনন্দ

অ, আ, ক, খ (১৯৯২) :- 

শিশু উপযোগী এইখন পুথি আখৰৰ ফলা শিকনিৰ লগতে আমোদজনক সাৱলীল শব্দবিন্যাসৰ পদ্য সংযোগ কৰি প্ৰকাশ কৰিছিল৷

আমাক কিতাপ লাগে (১৯৯৩) :-

আমাক কিতাপ লাগে (প্ৰথম সংস্কৰণ)

 কিশোৰ উপযোগীকৈ জুতি লব লগা, গিলি থব লগা আৰু ভালকৈ চোবাই হজম কৰিব লগা কিতাপৰ ভাগ সমূহকে ধৰি কিতাপৰ বিষয়ে ২৬ টা প্ৰবন্ধৰ সংকলন৷ প্ৰথম সংস্কৰণৰ বেটুপাতৰ শিল্পী কৃষ্ণেন্দু চাকি৷ কিতাপখনৰ এটা উল্লেখযোগ্য শাৰী হৈছে, “সমাজত শিক্ষিত সংখ্যা ক্ৰমে ক্ৰমে যথেষ্ট বাঢ়িছে, কিন্তু সেই অনুপাতে কিতাপ পঢ়া মানুহৰ সংখ্যা বঢ়া নাই৷”

আমাক কিতাপ লাগে

মানুহ হোৱাৰ গৌৰৱ (১৯৯৪):- 

মানুহ হোৱাৰ গৌৰৱ (প্ৰথম সংস্কৰণ)

মানুহ হোৱাৰ গৌৰৱ

কিশোৰ উপযোগী এইখন কিতাপত গোহাঞিদেৱে দক্ষিণ মেৰু অভিযানৰ আলোড়নকাৰী বর্ণনা সন্নিবিষ্ট কৰিছিল৷ ৰর্বাট ফেলকন স্কটে দক্ষিণ মেৰু অভিযান কৰিবলৈ যাওতে ‘আমুণ্ডেচন’ নামৰ অভিযান কাৰীয়ে পৰাজিত কৰি গৌৰৱৰ পৰা বঞ্চিত কৰে৷ কিন্তু স্কটৰ ধৈর্য্য, কষ্টসহিষ্ণুতা, নৈতিক সাহস আৰু পৰৰ কাৰণে আত্মত্যাগ কৰা আদর্শই নায়কত পৰিণত কৰিছিল৷ সকলোস্তৰৰ লোকে এইখন কিতাপ পঢ়ি বৰফৰ দেশৰ বহু কথা জানিব পাৰিব৷

স্কট (ফটো- উইকিপিডিয়া) 

মোৰ প্ৰিয় মানুহ ছক্ৰেটিছ (১৯৯৪) :- 

মোৰ প্ৰিয় মানুহ ছক্ৰেটিছ

গ্ৰীক দেশৰ আৰু পৃথিৱীৰ প্ৰথম দার্শনিক ছহিদ ছক্ৰেটিছৰ জীৱনৰ লগতে প্লেটো আৰু এৰিস্টটলৰ জীৱন কাহিনীযুক্ত কিতাপ৷ সহনশীল ছক্ৰেটিছৰ প্তনী জান্তিপ আছিল অতি খঙাল আৰু দন্দুৰী৷ মৃত্যুভয়ে তলাব নোৱৰা চক্ৰেটিছে হেমলক বিষ পান কৰি মৃত্যুক আকোঁৱালি লৈছিল৷  ছক্ৰেটিছৰ এষাৰ বাণী, “আটাইতকৈ সুখী মানুহ সেইজন, যিজনে কম বস্তুক লৈয়ে সন্তুষ্ট থাকিব পাৰে৷ কথা কমকৈ কবা, কাম বেছিকৈ কৰিবা৷ আনক উপদেশ কমকৈ দিবা, সৎলোকৰ উপদেশ বেছিকৈ লবা৷”  

চক্ৰেটিছ (ফটো- উইকিপিডিয়া)

অন্তহীন প্ৰেৰণাৰ উৎস- লুই পেষ্টঅ’ৰ (১৯৯৪) :- 

ফ্ৰাঞ্চৰ ইতিহাসৰ সর্বশ্ৰেষ্ঠ ব্যক্তিৰ তালিকাত প্ৰথম স্থান লাভ কৰা ৰসায়নবিজ্ঞানীজনৰ জীৱন কাহিনীৰে কিশোৰৰ উপযোগী কিতাপ৷

পে্ষ্টিঅ'ৰ (ফটো- উইকিপিডিয়া) 

বেঞ্জামিন ফ্ৰেঙ্কলিন (১৯৯৬):- 

আমেৰিকাৰ এজন শীর্ষস্থানীয় ৰাষ্ট্ৰনেতা, কূটনীতিবিদ, বৈজ্ঞানিক, সাংবাদিক, সমাজ সংস্কাৰক আৰু লেখক বেঞ্জামিন ফ্ৰেঙ্কলিনৰ জীৱন কাহিনীক কিশোৰৰ উপযোগীকৈ লিখা কিতাপ৷ কি কি গুণৰ বাবে ফ্ৰেঙ্কলিন পৃথিৱীবিখ্যাত ব্যক্তিলৈ পৰিণত হৈছিল তাৰ আভাষ কিতাপখনত দিছিল৷  

ফ্ৰেঙ্কলিন (ফটো- উইকিপিডিয়া) 

পোহৰৰ সাধনা (১৯৯৮) :- 

পোহৰৰ সাধনা

বিজ্ঞানী টমাচ আলভা এডিছনৰ জীৱন কাহিনীক কিশোৰৰ উপযোগীকৈ লিখা কিতাপ৷ কৌতুহলী আৰু জিজ্ঞাসু মনৰ অধিকাৰী এডিছনে বহু সময়, ধন আৰু মগজুৰ ব্যৱহাৰ কৰি বিজুলীবাটি আৱিস্কাৰ কৰিবলৈ সক্ষম হৈছিল৷ এডিছনে কৈছিল, ‘মই বিদ্যুৎ শক্তিক ইমান অধিক সহজলভ্য আৰু সুলভ মূল্যৰ বনাই দিম যে এদিন পৃথিৱীত কেৱল ধনী মানুহবোৰে হে মমবাতি জ্বলাব৷”

এডিছন (ফটো- উইকিপিডিয়া)

ডাৰউইন:- যুগান্তকাৰী বিজ্ঞানী (২০০৪) :-  

ডাৰউইন (প্ৰথম সংস্কৰণ)

বিৱর্তন তত্ত্বৰ বাবে বিখ্যাত বিজ্ঞানী ডাৰউইনৰ জীৱন কাহিনীক কিশোৰৰ উপযোগীকৈ লিখা কিতাপ৷ কিতাপখনত হৰিনাথ পাঠক নামৰ ব্যক্তিজনে দেবব্ৰত নামৰ কিশোৰজনক ডাৰউইনৰ লগতে বহুকেইজন বিজ্ঞানী আৰু মনীষীৰ জীৱন কাহিনীও বর্ণনা দিছিল৷  

ডাৰউইন (ফটো- উইকিপিডিয়া)

কিশোৰ সাৰথি (২০১০) :- 

কিশোৰ সাৰথি

এইখন গ্ৰন্থ কিশোৰৰ বাবে লিখা ১০ খন গ্ৰন্থ ক্ৰমে- কিতাপ পঢ়াৰ আনন্দ, আধুনিক যুগৰ জন্ম কাহিনী, বেঞ্জামিন ফ্ৰেঙ্কলিন, অন্তহীন প্ৰেৰণাৰ উৎস লুই পেষ্টিঅ’ৰ, মোৰ প্ৰিয় মানুহ চক্ৰেটিছ, মানুহ হোৱাৰ গৌৰৱ, পোহৰৰ সাধনাঢ ডাৰউইন. স্বাস্থ্য ৰক্ষাৰ সহজ নিয়ম আৰু উচ্চাকাংক্ষা ক একত্ৰে সংকলন কৰিছে৷