কিতাপ- ৯৯৫৭

ডাঙৰ মানুহৰ সাধু- দিগন্ত ওজা

বান্ধৱ/ প্ৰথম প্ৰকাশ ২০২০ (দ্বিতীয় প্ৰকাশ ২০২১)/ বেটুপাতৰ কেৰিকেচাৰ- প্ৰদীপ নাথ/ মূল্য- ১০০.০০ টকা/ মুঠ পৃষ্ঠা- ৬৮৷

কিতাপখনৰ আঁৰৰ কাহিনী:- কিতাপখনৰ আৰম্ভনিতেই উল্লেখ আছে, চয়ন, পঢ়াকোঠাত সোমালেই ‘দেউতা, মোৰ বাবে কিতাপ এখন লিখাচোন’ বুলি তুমি আবদাৰ ধৰাৰ বাবেই ‘ডাঙৰ মানুহৰ সাধু’ ৰ জন্ম৷ এইখন সেই কাৰণে তোমাকেই দিলোঁ৷’ লেখক দিগন্ত ওজাই পুত্ৰ নিষাদ চয়ন ওজাৰ আবদাৰত লিখা কিতাপকখনে ২০২২ বর্ষত সাহিত্য অকাডেমীৰ শিশু সাহিত্য পুৰস্কাৰ লাভ কৰিছে৷  প্ৰাথমিক বিদ্যালয়ৰ পঢ়ুৱৈ/ শ্ৰোতাৰ উপযোগীকৈ ঘৰুৱা আৰু স্কুলীয়া পৰিবেশৰ মাজেৰে আগবঢ়াই নিয়া কিতাপখন আটাইকেইটা কাহিনীয়ে উপভোগ্য৷ তথ্যৰ ভৰৰ পৰা অলপ আতঁৰত আৰু ভূগোল-ইতিহাস বর্ণনাই কিতাপখন শিশু উপযোগী হোৱাত অধিক সহায় কৰিছে৷ লগতে পৃষ্ঠাই পৃষ্ঠাই সন্নিবিষ্ট চিত্ৰ আৰু স্কেচ সমূহে পাঠক সন্মোহিত কৰাত সহায় কৰিছে৷ জন্মদিন, পূজাৰ উপহাৰত এইখন অভিভাৱকে সন্তানৰ হাঁতত তুলি দিব পাৰে৷

কিতাপখনত সন্নিবিষ্ট সাধু কেইটাৰ আটাইকেইজনেই বিজ্ঞানী৷ তেওঁলোক হৈছে- 

খালত পৰা ল’ৰাটো ( প্ৰাচীন গ্ৰীক বিজ্ঞানী থালিচ); 

থালিচ

বাপেকক নোপোৱা ছোৱালীজনী (কবি বাইৰনৰ কন্যা তথা কম্পিউটাৰ ভাষা উদ্ভাৱক আডা বাইৰন); 

আদা বাইৰন

‘জলহু’ ল’ৰাটোৰ চমক (পদার্থ বিজ্ঞানী জেমছ ক্লার্ক মেক্সৱেল); 

মেক্সৱেল

মাকে চুমা নোখোৱা মাৰিয়া (দুবাৰকৈ ন’বেল বঁটা প্ৰাপক মেৰী কুৰী); 

মেৰী কুৰী

কণমানিটোৰ কিমান যে প্ৰশ্ন… (অসম্পুর্ণতাৰ সূত্ৰ বা গডেলৰ সূত্ৰৰ বাবে বিখ্যাত পদার্থ বিজ্ঞানী কূর্ট গডেল);

গডেল

        এজনী ‘দুষ্ট’ ছোৱালী’ (২০১৮ চনত ৰসায়নৰ ন’বেল বঁটা প্ৰাপক ফ্ৰাঞ্চিছ আৰনল্ড)৷

ফ্ৰাঞ্চিছ

কিতাপখনৰ পৰা এছোৱা

‘অভিভাৱকসকলৰ প্ৰতি’

ডাঙৰ মানুহৰ সাধু আচলতে কণমানিহঁতৰেই সাধু৷ অভিভাৱক সকলে টং কৰি চালে দেখিব যে ইয়াত সন্নিবিষ্ত ছটা কাহিনীৰ তিনিটি পুৰুষৰ তিনিটি নাৰীৰ৷ চিন্তাৰ জগতত যে পুৰুষ নাৰীৰ কোনো ভেদ নাই, সেই কথা কণমানিহঁতে অনুভৱ কৰক—তাৰেই এয়া সচেতন প্ৰয়াস৷ আমাৰ ভাষাত বিজ্ঞানীৰ বহু জীৱনী সংকলন পঢ়িলে নাৰীতকৈ পুৰুষৰ প্ৰাধান্যৰ কথা অনুভৱ হয়৷ ইয়াৰ এক সামাজিক পটভূমিও নোহোৱা নহয়৷ কুৰি শতিকাৰ আৰম্ভণিলৈকে ইউৰোপত নাৰী শিক্ষাৰ সীমাবদ্ধতা আৰু শিক্ষাত পুৰুষতান্ত্ৰিক ব্যৱস্থা বর্তি আছিল৷ আনকি ২০১৮ ত ইতিহাসত তৃতীয়গৰাকী আৰু ৫৫ বছৰৰ পাছত দ্বিতীয়গৰাকী পদার্থ বিজ্ঞানী হিচাপে ন’বেল বঁটা লাভ কৰা ডেৰঘণ্টা পাছলৈকে অনলাইন এনচাইক্ল’পেডিয়া উইকিপিডিয়াত ডোনা ষ্ট্ৰিকলেণ্ডৰ বিষয়ে কোনো প্ৰফাইল পেজেই নাছিল৷ কিন্তু মগজুৰ কোনো সীমা নাই আৰু এই ক্ষেত্ৰত পুৰুষ-মহিলাৰ মস্তিস্কৰ ক্ষমতা একে৷ প্ৰয়োজন মাত্ৰ পৰিৱেশ, আগ্ৰহ আৰু নিষ্ঠাৰ৷ এই কথা তুলি ধৰাই ডাঙৰ মানুহৰ সাধু’ৰ উদ্দেশ্য৷ কাহিনীসমূহ নির্বাচন কৰোঁতে মন কৰা হৈছে যাতে মহৎ লোকৰ শৈশৱৰ সৈতে আমাৰ শিশুসকলেও একাত্ম অনুভৱ কৰে৷ আমাৰ শিশু পঢ়ুৱৈয়ে অনুভৱ কৰক যে যিসকলক ‘ডাঙৰ মানুহ’ বুলি ভবা হয় তেওঁলোকো এদিনতে ‘ডাঙৰ মানুহ’ হোৱা নাই—শৈশৱৰপৰাই এই কথা জনাৰ হেঁপাহ গঢ়ি নিৰন্তৰ সাধনাৰে যিকোনো লোকেই মহৎ লক্ষ্যত উপনীত হ’ব পাৰে৷ আন অর্থত এই ‘সাধু’বোৰ পঢ়ি আমাৰ শিশুসকলেও তেওঁলোকে পোৱা পৰিৱেশৰ মাজেৰেই নিজক গঢ়িব পৰাৰ সপোন দেখক- সেয়াই আমাৰ লক্ষ্য৷” (পৃষ্ঠা-৬৫)