কিতাপৰ পৃথিৱীত চিৰঞ্জীৱৰ সৈতে

 

আন্তর্জাতিক সন্থা- ৰাষ্ট্ৰসংঘ আৰু অন্যান্য

অতি চমু উত্তৰৰ প্ৰশ্ন

১. ৰাষ্ট্ৰসংঘ কিয় গঠন হৈছিল ?

উত্তৰ:- দ্বিতীয় বিশ্বযুদ্ধৰ পিছত সৃষষটি হোৱা ভয়াৱহতা আৰু অবর্ণনীয় ধ্বংসলীলাৰ পৰা বিশ্ববাসীক সকাহ দিয়াৰ লগতে শান্তি স্থাপনৰ বাবে ৰাষ্ট্ৰসংঘ গঠন কৰা হৈছিল৷

২. ৰাষ্ট্ৰসংঘৰ দুটা উদ্দেশ্য উল্লেখ কৰা৷

উত্তৰ:-  ক) আন্তঃৰাষ্ট্ৰীয় শান্তি আৰু নিৰাপত্তা বজাই ৰখা আৰু খ) সমান অধিকাৰ আৰু আত্মনিয়ন্ত্ৰণৰ ভিত্তিত দেশসমূহৰ মাজত বন্ধুত্বপূর্ণ সর্ম্পক প্ৰতিষ্ঠা কৰা৷

৩. ৰাষ্ট্ৰসংঘৰ অংগকেইটাৰ নাম লিখা৷

উত্তৰ:- ৰাষ্ট্ৰসংঘৰ প্ৰধান অংগকেইটা ক্ৰমে- ক) সাধাৰণ সভা, খ) নিৰাপত্তা পৰিষদ, গ) অর্থনৈতিক আৰু সামাজিক পৰিষদ ঘ) ন্যাসৰক্ষী পৰিষদ, ঙ) আন্তর্জাতিক ন্যায়ালয় চ) ন্যাসৰক্ষী পৰিষদ আৰু ছ) সচিবালয়৷

৪. ৰাষ্ট্ৰসংঘৰ লগত জড়িত থকা দুটা এজেন্সিৰ নাম লিখা৷

উত্তৰ:- আন্তঃৰাষ্ট্ৰীয় শ্ৰমিক সংঘ আৰু বিশ্ব স্বাস্থ্য সংস্থা

৫. নিৰস্ত্ৰীকৰণৰ সর্ম্পকত সম্পাদিত হোৱা দুখন চুক্তিৰ নাম লিখা৷

উত্তৰ:-  ৰাষ্ট্ৰসংঘৰ পাৰমাণৱিক অস্ত্ৰ নিয়ন্ত্ৰণ চুক্তি (১৯৯৩)  আৰু ৰাষ্ট্ৰসংঘৰ ‘বহিঃ মহাকাশ চুক্তি (১৯৬৭)  

৬. মানৱ অধিকাৰ মানে কি বুজা ?

উত্তৰ:- বিশ্বৰ প্ৰত্যেকজন ব্যক্তিয়ে মর্যাদাপূর্ণ জীৱন যাপনৰ বাবে প্ৰয়োজন হোৱা কিছুমান অধিকাৰক সুৰক্ষা দিয়াই মানৱ অধিকাৰ৷

দীঘল উত্তৰৰ প্ৰশ্ন

১. ৰাষ্ট্ৰসংঘ গঠনৰ উদ্দেশ্য আৰু ইয়াৰ নীতিকেইটা আলোচনা কৰা৷

উত্তৰ :- দ্বিতীয় বিশ্বযুদ্ধৰ পাছত বিশ্বত শান্তি স্থাপনৰ বাবে ১৯৪৫ চনত ৰাষ্ট্ৰসংঘ স্থাপন কৰা হৈছিল৷ ৰাষ্ট্ৰসংঘই আন্তঃৰাষ্ট্ৰীয় শান্তি আৰু শৃংখলা প্ৰতিষ্ঠা কৰি বিবাদমান বিষয়সমূহৰ শান্তিপূর্ণ সমাধানৰ বাট মুকলি কৰাৰ পথ সুগম কৰে৷ ৰাষ্ট্ৰসংঘ গঠনৰ ৪ টা উদ্দেশ্য আছে৷ তলত উল্লেখ কৰা হ’ল-

ক) আন্তঃৰাষ্ট্ৰীয় শান্তি আৰু নিৰাপত্তা বজাই ৰখা৷

খ) সমান অধিকাৰ আৰু আত্মনিয়ন্ত্ৰণৰ ভিত্তিত দেশসমূহৰ মাজত বন্ধুত্বপূর্ণ সর্ম্পক প্ৰতিষ্ঠা কৰা৷

গ) আন্তঃৰাষ্ট্ৰীয় সহযোগিতাৰ ভিত্তিত অর্থনৈতিক, সামাজিক আৰু সাংস্কৃতিক সমস্যাসমূহৰ সমাধান কৰা আৰু প্ৰত্যেকজন ব্যক্তিয়ে যাতে মানৱ অধিকাৰ আৰু মৌলিক অধিকাৰ উপভোগ কৰিব পাৰে তাৰ ব্যৱস্থা কৰা৷

ঘ) উল্লেখিত উদ্দেশ্যসমূহ সাধনৰ বাবে বিভিন্ন দেশৰ মাজত সম্বন্ধ প্ৰতিষ্ঠাৰ কেন্দ্ৰ হিচাপে কার্য সম্পাদনা কৰা৷

ৰাষ্ট্ৰসংঘৰ কেইটামান নীতিও আছে৷ তলত উল্লেখ কৰা হ’ল-

ক) সকলো সদস্য ৰাষ্ট্ৰৰ সমান সার্বভৌম নীতিৰ ভিত্তিত ৰাষ্ট্ৰসংঘ প্ৰতিষ্ঠা হ’ব৷

খ) ৰাষ্ট্ৰসংঘৰ চনদত উল্লেখ কৰা নিয়মাৱলী মানি লৈ সকলো সদস্য ৰাষ্ট্ৰই নিজা দায়িত্ব পালন কৰিব লাগিব৷

গ) আর্ন্তজাতিক সর্ম্পক ৰক্ষা কৰাৰ স্বার্থত কোনো সদস্য ৰাষ্ট্ৰই শক্তি প্ৰয়োগ কৰিব নোৱাৰিব৷

ঘ) আন্তঃৰাষ্ট্ৰীয় শান্তি, নিৰাপত্তা আৰু ন্যায়ত কোনো আঘাত নোহোৱাকৈ সকলো সদস্য ৰাষ্ট্ৰই সকলো ধৰণৰ বিবাদ শান্তিপূর্ণভাৱে মীমাংসা কৰিব লাগিব৷

ঙ) ৰাষ্ট্ৰসংঘই কোনো ব্যৱস্থা গ্ৰহণ কৰিলে সদস্য ৰাষ্ট্ৰসমূহে সহায় কৰিব লাগিব আৰু ৰাষ্ট্ৰসংঘই শাস্তিমূলক ব্যৱস্থা গ্ৰহণ কৰা ৰাষ্ট্ৰক সহায় কৰিব নোৱাৰিব৷

চ) ৰাষ্ট্ৰসংঘই সদস্য ৰাষ্ট্ৰসমূহৰ আভ্যন্তৰীণ বিষয়ত হস্তক্ষেপ নকৰিব৷

২. ৰাষ্ট্ৰসংঘৰ নিৰাপত্তা পৰিষদৰ ওপৰত এটা টোকা লিখা৷

উত্তৰ :- নিৰাপত্তা পৰিষদ হৈছে ৰাষ্ট্ৰসংঘৰ এটা গুৰুপ্তপূর্ণ অংগ৷ গঠনৰ সময়ত পৰিষদৰ স্থায়ী সদস্য আছিল ৫ জন৷ ক্ৰমে আমেৰিকা, গ্ৰেট বৃটেইন, ফ্ৰান্স, ৰাছিয়া আৰু চীন৷ আৰু ৬ জন অস্থায়ী  সদস্য৷ ১৯৬৩ চনত ১০ জন অস্থায়ী সদস্যলৈ বৃদ্ধি কৰে৷ অস্থায়ী সদস্য ৰাষ্ট্ৰকেইখনক সাধাৰণ সভাই নির্বাচিত কৰে৷ কোনো গুৰুপ্তপূর্ণ বিষয়ত সিদ্ধান্ত ল’বলৈ স্থায়ী সদস্য সহ মুঠ ৯ জন সদস্যৰ সন্মতি থাকিব লাগিব৷ স্থায়ী সদস্যসকলৰ ‘ভেটো’ প্ৰয়োগৰ ক্ষমাতা আছে৷ কোনো বিষয়ত স্থায়ী সদস্যই ‘ভেটো’ দিলে নিৰাপত্তা পৰিষদত সিদ্ধান্ত গ্ৰহণ নহয়৷

৩. বিশ্ব শান্তিৰ বাবে ৰাষ্ট্ৰসংঘই লোৱা পদক্ষেপসমূহ আলোচনা কৰা৷

উত্তৰ :- বিশ্বত যুদ্ধৰ বিভীষিকা আঁতৰ কৰি বিশ্বাস আৰু আস্থাৰ এখন পৃথিৱী গঠন কৰাৰ লক্ষ্যৰে স্থাপন কৰা ৰাষ্ট্ৰসংঘই আৰম্ভণিৰে পৰা কাম কৰি আহিছে৷ ৰাষ্ট্ৰসমূহৰ মাজত যুদ্ধৰ পৰিৱেশ নোহোৱা কৰাৰ অর্থে বহুতো পদক্ষেপ গ্ৰহণ কৰিছে৷ তলত তাৰে কিছুমান আয়োগ আৰু চুক্তিৰ তালিকা দিয়া হ’ল-

১৯৫২:- জানুৱাৰী ৰাষ্ট্ৰসংঘই নিৰস্ত্ৰীকৰণ আয়োগ গঠন কৰে৷

১৯৬৩:- ৰাষ্ট্ৰসংঘৰ তৎপৰতাত ‘আংশিকভাৱে আণৱিক অস্ত্ৰৰ বিস্ফোৰণ নিষিদ্ধ চুক্তি’

১৯৬৭:- ৰাষ্ট্ৰসংঘৰ ‘বহিঃ মহাকাশ চুক্তি’ ৷

১৯৬৮:- ৰাষ্ট্ৰসংঘৰ ‘পাৰমাণৱিক অস্ত্ৰ সংকোচন চুক্তি’

১৯৭১:- ৰাষ্ট্ৰসংঘৰ সমুদ্ৰতলি নিয়ন্ত্ৰণ চুক্তি৷  

১৯৭২:- ৰাষ্ট্ৰসংঘৰ ‘ছল্ট-১’ চুক্তি৷

১৯৭৯:- ৰাষ্ট্ৰসংঘৰ ‘ছল্ট-২’ চুক্তি

১৯৯১:- ৰাষ্ট্ৰসংঘৰ START-1 চুক্তি৷

১৯৯৩:- ৰাষ্ট্ৰসংঘৰ পাৰমাণৱিক অস্ত্ৰ নিয়ন্ত্ৰণ চুক্তি৷  

১৯৯৬:- ১৫৮ খন ৰাষ্ট্ৰৰ সমর্থতন ৰাষ্ট্ৰসংঘৰ ‘পাৰমাণৱিক অস্ত্ৰ পৰীক্ষা নিষিদ্ধকৰণ’ চুক্তি

২০০৭:- ৰাষ্ট্ৰসংঘই ‘প্ৰতিৰোধমূলক কূটনীতি’ গ্ৰহণ কৰি বিবাদ মীমাংসা কৰা পন্থা অৱলম্বন৷

এনেদৰে ৰাষ্ট্ৰসংঘই শান্তি ৰক্ষাৰ বাবে কাম কৰি আহিছে৷ এই ক্ষেত্ৰত সদস্য ৰাষ্ট্ৰসমূহে সদিচ্ছা, সহযোগিতা আৰু অনুগত্য প্ৰদর্শন কৰিব লাগিব৷

৪. ভাৰতবর্ষৰ ৰাষ্ট্ৰীয় মানৱ অধিকাৰ আয়োগ সর্ম্পকত এটা টোকা লিখা৷

উত্তৰ:- ৰাষ্ট্ৰসংঘৰ আহ্বানমতে ভাৰত চৰকাৰেও ১৯৯৩ চনৰ ১২ অক্টোবৰ তাৰিখে ৰাষ্ট্ৰীয় মানৱ অধিকাৰ আয়োগ গঠন কৰিছিল৷ পিছৰ বছৰৰ ৮ জানুৱাৰীৰ পৰা অইনখনত ‘মানৱ অধিকাৰ সুৰক্ষা আইন-১৯৯৩’ নামেৰে জনা গৈছিল৷ আয়োগৰ সভাপতিজন উচ্চতম ন্যায়ালয়ৰ প্ৰাক্তন মূখ্য ন্যায়াধীশ হোৱাৰ বাদেও সদস্য সকলৰ এজন উচ্চতম ন্যায়ালয়ৰ ন্যায়াধীশ অথবা প্ৰাক্তন ন্যায়াধীশ; এজন সদস্য কোনো উচ্চ ন্যায়ালয়ৰ মুখ্য ন্যায়াধীশ অথবা প্ৰাক্তন মুখ্য ন্যায়াধীশ আৰু দুজন সদস্য মানৱ অধিকাৰ সর্ম্পকীয় জ্ঞান আৰু অভিজ্ঞতা থকা ব্যক্তি৷ ইয়াৰ উপৰিও সংখ্যালঘূ আয়োগৰ সভাপতি, অনুসূচিত জাতি আৰু জনজাতিৰ ৰাষ্ট্ৰীয় আয়োগৰ সভাপতি আৰু ৰাষ্ট্ৰীয় মহিলা আয়োগৰ সভাপতিও আয়োগৰ সদস্য পদত থাকিব৷ সকলোকে ভাৰতৰ ৰাষ্ট্ৰপতিয়ে ৫ বছৰৰ বাবে নিযুক্তি দিয়ে৷ ভাৰতবর্ষত মানৱ অধিকাৰ উলংঘনৰ সকলো দিশ পর্যালোচনা কৰি তাৰ বিহিত ব্যৱস্থাৰ বাবে চৰকাৰৰ ওচৰত প্ৰতিবেদন দাখিল কৰাৰ লগতে ৰাষ্ট্ৰীয় মানৱ অধিকাৰ আয়োগে এই দিসত অতন্দ্ৰ প্ৰহৰীৰ ভূমিকা ল’ব লাগে৷                                                                                                                                    

৫, মানৱ অধিকাৰ সর্ম্পকত ৰাষ্ট্ৰসংঘই লোৱা পদক্ষেপ আলোচনা কৰা৷

উত্তৰ:- বিশ্বৰ মানৱ সমাজৰ অধিকাৰসমূহ সুৰক্ষা দিবলৈ ৰাষ্ট্ৰসংঘই ১৯৪৬ চনত মানৱ অধিকাৰ আয়োগ গঠন কৰে৷ বর্তমান ইয়াৰ সদস্য সংখ্যা ৫৩ জন৷ সংখ্যা গৰিষ্ঠতাৰ ওপৰত ভিত্তি কৰি অয়োগে সিদ্ধান্তবোৰ গ্ৰহণ কৰে৷

    বিশ্বত শান্তিৰ বাতাবৰণ অনাৰ উদ্দেশ্যে আৰু ৰাষ্ট্ৰসমুহৰ মাজত সহযোগিতা বৃদ্ধিৰ বাবে গঠিত ৰাষ্ট্ৰসংঘই অতি গুৰুপ্তপূর্ণভাৱে মানৱ অধিকাৰ ৰক্ষাৰ দিশটোত বিশেষ গুৰুপ্ত প্ৰদান কৰি আহিছে৷ বিশ্বৰ প্ৰত্যেকজন ব্যক্তিয়ে মর্য্যদাপূর্ণ জীৱন যাপনৰ বাবে প্ৰয়োজন হোৱা কিছুমান অধিকাৰক সুৰক্ষা দিয়াৰ অর্থে ৰাষ্ট্ৰসংঘৰ সাধাৰণ সভাই ১৯৪৮ চনৰ ১০ ডিচেম্বৰত ৪৮ খন ৰাষ্ট্ৰৰ সমর্থনত মানৱ অধিকাৰ ঘোষণাপত্ৰ গ্ৰহণ কৰে৷ সেই  দিনটো মানৱ অধিকাৰ দিৱস হিচাপেও পালন কৰাৰ সিদ্ধান্ত গ্ৰহণ কৰে৷ ঘোষণাপত্ৰৰ দুটা উদ্দেশ্য আছিল ক্ৰমে- বিশ্বৰ জনগণৰ বাবে প্ৰয়োজনীয় অধিকাৰসমূহ এই ঘোষণাপত্ৰত সন্নিবিষ্ট হৈছে আৰু দ্বিতীয়তে এই ঘোষণাপত্ৰত উল্লীখিত অধিকাৰসমূহক সদস্য ৰাষ্ট্ৰসমূহে স্বীকৃতি দিছে৷ এনেদৰে ৰাষ্ট্ৰসংঘই মানৱ অধিকাৰ সুৰক্ষাৰ বাবে কাম কৰিছে৷   

 টাইমলাইন

১৯১৪:- প্ৰথম বিশ্বযুদ্ধ৷ বিশ্বত শান্তি স্থাপন আৰু যুদ্ধক বিদায় দিয়াৰ বাবে আন্তর্জাতিক সংগঠন ‘জাতি সংঘ’ স্থাপন৷

১৯৩৯:- দ্বিতীয় বিশ্বযুদ্ধ আৰম্ভ৷

১৯৪৫:- ২৪ অক্টোবৰত ৫১ খন ৰাষ্ট্ৰ লগ হৈ ছানফ্ৰান্সিকো সন্মিলনৰ চনদত চহী কৰি ৰাষ্ট্ৰসংঘৰ (United Nations Organisation) জন্ম দিয়ে৷ ২৪ অক্টোবৰ ৰাষ্ট্ৰসংঘ দিৱস৷

·              মুখ্য কার্যালয়- আমেৰিকা যুক্তৰাষ্ট্ৰৰ নিউর্য়ক৷

·            চনদৰ মুঠ অনুচ্চেদ- ১১১ টা

·            প্ৰথম সচিবপ্ৰধান:- নৰ’ৱেৰ ট্ৰাইভহাল্ডান লী৷

·            বর্তমানৰ সদস্য ৰাষ্ট্ৰ- ১৯৩ আৰু সচিবপ্ৰধান পর্তুগালৰ এনটনিও গুৱেটেৰেছ৷

·           প্ৰধান অংগ- ৬ টা ক্ৰমে-ক) সাধাৰণ সভা, খ) নিৰাপত্তা পৰিষদ, গ) অর্থনৈতিক আৰু সামাজিক পৰিষদ ঘ) ন্যাসৰক্ষী পৰিষদ, ঙ) আন্তর্জাতিক ন্যায়ালয় চ) ন্যাসৰক্ষী পৰিষদ আৰু ছ) সচিবালয়৷

·        সাধাৰণ সভালৈ প্ৰত্যেক সদস্য ৰাষ্ট্ৰই ৫ জনকৈ প্ৰতিনিধি পঠাব পাৰে যদিও ৰাষ্ট্ৰখনৰ ভোট এটা৷ বছেৰেকত এবাৰ সভা অনু্ষ্ঠিত হয়৷

·        নিৰাপত্তা পৰিষদত স্থায়ী সদস্য ৫ জন (আমেৰিকা, গ্ৰেট বৃটেইন, ফ্ৰান্স, ৰাছিয়া আৰু চীন) আৰু অস্থায়ী প্ৰথমে ৬ জন৷ কিন্তু ১৯৬৩ ৰ পৰা ১০ জন কৰে৷ স্থায়ী সদস্যই ‘ভেটো’ প্ৰয়োগৰ ক্ষমতা আছে৷ (২৩ নং অনুচ্চেদ মতে গঠিত)

·        অর্থনৈতিক আৰু সামাজিক পৰিষদৰ প্ৰথমে সদস্য ১৮ জন যদিও বর্তমান ৫৪ জন৷ কার্য্যকাল ৩ বছৰ৷ সদস্য সকলক সাধাৰণ সভাই নির্বাচন কৰে৷ (৫৫ নং অনুচ্চেদ মতে গঠিত)

·        ন্যাসৰক্ষী পৰিষদত ৩ ধৰণৰ সদস্য থাকে৷ (৭৬ নং অনুচ্চেদ মতে গঠিত)

·        আন্তর্জাতিক ন্যায়ালয় ১৫ জন ন্যায়ধীশৰ দ্বাৰা গঠিত৷ সকলো সদস্য ৰাষ্ট্ৰ এই আদালতৰ সদস্য৷

·       সচিবালয় ৰাষ্ট্ৰসংঘৰ প্ৰাণকেন্দ্ৰ স্বৰূপ৷ নিৰাপত্তা পৰিষদৰ অনুমোদন ক্ৰমে সাধাৰন সভাই সচিব প্ৰধানক নিয়োগ কৰে৷ কার্য্যকাল ৫ বছৰ৷ পুনৰ নির্বাচিত হোৱাৰ সুবিধা আছে৷ (৯৭ নং অনুচ্চেদ মতে গঠিত)

১৯৪৬:- ১৬ ফেব্ৰুৱাৰী- ১৮ জন সদস্যৰে ৰাষ্ট্ৰসংঘৰ মানৱ অধিকাৰ আয়োগ গঠন৷ বর্তমান সদস্য ৫০ জন৷

১৯৪৮:- ৰাষ্ট্ৰসংঘৰ সাধাৰণ সভাই ৪৮ খন সদস্য ৰাষ্ট্ৰৰ সমর্থনত মানৱ অধিকাৰ ঘোষণা পত্ৰত চহী কৰে৷ ১০ ডিচেম্বৰ মানৱ অধিকাৰ দিৱস৷

১৯৫২:- জানুৱাৰী ৰাষ্ট্ৰসংঘই নিৰস্ত্ৰীকৰণ আয়োগ (Dis- armmament Commission)  গঠন কৰে৷

১৯৬৩:- ৰাষ্ট্ৰসংঘৰ তৎপৰতাত ‘আংশিকভাৱে আণৱিক অস্ত্ৰৰ বিস্ফোৰণ নিষিদ্ধ চুক্তি’ (Partial Nuclear Test Ban Treaty)  সম্পাদন৷

১৯৬৭:- ৰাষ্ট্ৰসংঘৰ ‘বহিঃ মহাকাশ চুক্তি’ (Outer Space Treaty)  সম্পাদন৷

১৯৬৮:- ৰাষ্ট্ৰসংঘৰ ‘পাৰমাণৱিক অস্ত্ৰ সংকোচন চুক্তি’ (Nuclear Non-proliferation Treaty) সম্পাদন৷

১৯৭১:- ৰাষ্ট্ৰসংঘৰ সমুদ্ৰতলি নিয়ন্ত্ৰণ চুক্তি’ (Seabed Control Treaty)  সম্পাদন৷

১৯৭২:- ৰাষ্ট্ৰসংঘৰ ‘ছল্ট-১’ (Strategic Arms Limitation Treaty)  চুক্তি সম্পাদন৷

১৯৭৯:- ৰাষ্ট্ৰসংঘৰ ‘ছল্ট-২’ চুক্তি সম্পাদন৷

১৯৯১:- ৰাষ্ট্ৰসংঘৰ চুক্তি  Strategic Arms reduction Treaty- START-1 সম্পাদন (1993- START-2)  

১৯৯৩:- ৰাষ্ট্ৰসংঘৰ পাৰমাণৱিক অস্ত্ৰ নিয়ন্ত্ৰণ চুক্তি (Nuclear Arms Contron Treaty) সম্পাদন৷

·        ভিয়েনাত অনুষ্ঠিত ৰাষ্ট্ৰসংঘৰ মানৱ অধিকাৰ সর্ম্পকীয় অধিৱেশনত সকলো সদস্য ৰাষ্ট্ৰক মানৱ অধিকাৰ গঠনত গুৰুপ্ত দিবলৈ দোহাৰে৷

·        ১২ অক্টোবৰত ভাৰতবর্ষত ৰাষ্ট্ৰীয় মানৱ অধিকাৰ আয়োগ গঠন কৰে৷ আয়োগৰ সভাপতিজন উচ্চতম ন্যায়ালয়ৰ প্ৰাক্তন মুখ্য ন্যায়ধীশ৷ কার্য্যকাল ৫ বছৰ৷

১৯৯৬:- ১৫৮ খন ৰাষ্ট্ৰৰ সমর্থতন ৰাষ্ট্ৰসংঘৰ ‘পাৰমাণৱিক অস্ত্ৰ পৰীক্ষা নিষিদ্ধকৰণ’ (Comprehensive Test Ban Treaty- CTBT) চুক্তি সম্পাদন৷

২০০৭:- ৰাষ্ট্ৰসংঘই ‘প্ৰতিৰোধমূলক কূটনীতি’ গ্ৰহণ কৰি বিবাবদ মীমাংসা কৰা পন্থা অৱলম্বন৷

 

ৰাষ্ট্ৰসংঘৰ কেইটামান অভিকৰণ:-

১. আন্তঃৰাষ্ট্ৰীয় শ্ৰমিক সংঘ (International Labour Organisation- ILO)

২. বিশ্ব স্বাস্থ্য সংস্থা (World Health Organisation- WHO)

৩. ৰাষ্ট্ৰসংঘৰ উন্নয়ন আঁচনি (United Nations Development Programme- UNDP)

৪. ৰাষ্ট্ৰসংঘৰ মানৱ অধিকাৰ আয়োগ (United Nations Human Right Commission- UNHRC)

৫. ৰাষ্ট্ৰসংঘৰ শিশু পূঁজি (United Nations International Childern’s Emergency Fund- UNICEF)

৬. ৰাষ্ট্ৰসংঘৰ শিক্ষা বিজ্ঞান আৰু সাংস্কৃতিক সংগঠন (United Nations Educational, Scientific and Cultural Organization- UNESCO)

৭. আন্তঃৰাষ্ট্ৰীয় মুদ্ৰা নিধি ((International Monetary Fund- IMF)

৮. খাদ্য আৰু কৃষি সংগঠন (Food and Agriculture Organisation- FAO)

কেইটামান গুৰুপ্তপূর্ণ আন্তর্জাতিক অনুষ্ঠান আৰু মূখ্য কার্যালয়

১. জাতি সমূহৰ সংঘ (Commonwealth of Nations) - লণ্ডন

২. এমনেষ্টি ইণ্টাৰনেছনেল (Amnesty international-AI)- লণ্ডন

৩. উত্তৰ আটলাণ্টিক চুক্তি সংগঠন (North Atlantic Treaty Organisation- NATO)- ব্ৰুচেলছ

৪. আন্তঃৰাষ্ট্ৰীয় নবীকৰণযোগ্য শক্তি অভিকৰণ (International Renewable Energy Agency) - সংযুক্ত আৰৱ এমিৰেটছ

৫. এছিয়া প্ৰশান্ত মহাসাগৰীয় অর্থনৈতিক নিগম (APEC)- ছিংগাপুৰ

৬. দক্ষিণ- পূৱ এছীয়া জাতিসমূহৰ সংস্থা (ASEAN) – জাকার্টা

৭. আন্তঃৰাষ্ট্ৰীয় ক্ৰিকেট পৰিষদ (ICC)- ডুবাই

৮. আন্তঃৰাষ্ট্ৰীয় ফুটবল ফেডাৰেচন (FIFA) - জুৰিক

৯. বিশ্ব অর্থনৈতিক মঞ্চ (World Economic Forum- WEF) - জেনেভা

১০. আন্তঃৰাষ্ট্ৰীয় হকী ফেডাৰেচন (International Hockey Federation) - লৌচেন, ছুইজাৰলেণ্ড

১১. দক্ষিণ এছীয় আঞ্চলিক সহযোগিতা সংস্থা (South Asian Association for Regional Cooperation- SAARC) - কাঠমাণ্ড

শব্দার্থ:-

ভেটো:-  ৰাষ্ট্ৰসংঘৰ নিৰাপত্তা পৰিষদৰ স্থায়ী সদস্য ৫ খন ৰাষ্ট্ৰৰ বিশেষ ক্ষমতা৷ কোনো সদস্যই ‘ভেটো’ দিলে  সিদ্বান্ত গ্ৰহণ কৰা নহয়৷